AS FAMILIAS AXÚDANNOS

Xa vos dixéramos que as nosas familias eran listísimas. Tan pronto lles preguntamos, resolveron a cuestión. Seica a bota misteriosa debe ser dun peregrino que a perdeu mentres facía o Camiño de Santiago. Tamén nos deron libros e información quitada de internet para traer á clase e compartila co resto de compañeiros/as e coa mestra.

A INVESTIGAR

Está claro que vai ser máis difícil do que pensabamos. O mellor será investigar a ver se así atopamos algunha pista que nos axude.

O primeiro que fixemos foi buscar en internet información sobre zapatos. 

Cantos hai! E que diferentes son!

Aprendemos moitos nomes de zapatos e para que se usa cada un: zapato, bota, sandalia, chancla, zoco... E chegamos á conclusión de que a bota que apareceu na clase é unha bota de senderismo, é dicir, unha bota de camiñante, de andar polos camiños pero, por que camiños?

O mellor será preguntarlles aos nosos papás e mamás que son moi listos e listas e sempre están dispostos a axudarnos e seguro que así descubrimos algo máis.

A PROBA DA BOTA

Hoxe viñeron á nosa clase varios profes dicindo que perderan unha bota pero, despois de que todos/as a probaran, seguimos sen atopar ao seu dono ou dona. Menudo misterio!

FACENDO DE DETECTIVES

Non tendo nin idea de quen pode ser o dono ou dona da bota misteriosa, decidimos que o mellor que podemos facer é o que se fai nestes casos, facer uns carteis de BÚSCASE e colocalos por todas partes: polos corredores, na sala de mestres, na porta da cociña, no comedor, en secretaría...

E agora toca esperar.

AS NOSAS HIPÓTESES

- Seguro que é de Barbanegra porque é marrón.

- Eu creo que é de Papá Noel.

- Non, de Papá Noel non pode ser porque as  botas de Papá Noel son negras e están limpas e esta está moi  sucia.

- De Papá Noel non é porque non ves que aquí non hai cheminea para entrar. 

- Pois entraría pola porta ou pola ventá.

- Ao mellor a bota está viva e veu ela soa e agora está durmindo porque está cansa de dar moitos pasos.

- Menuda tontería!

- Pode ser dunha pantasma.

- As pantasmas non usan botas, veñen voando.

- Eu penso que é do Gato con Botas. 

- Non, porque as botas do Gato con Botas non son así, son moito máis altas.

- O que está claro é que non é un regalo para nós porque os regalos  non son así.

- É dun home. É moi grande.

- Eu de maior quero ser maquinista de tren. Ao mellor é dun maquinista.

- Fixádevos! Ven da praia porque ten una cuncha dentro.

- Eu non teño nin idea ... pero vexo que o debuxo que ten a cuncha é o mesmo que o da camiseta do Celta.

- E se é dun ladrón. 

- Non, porque non roubou nada, non falta nada na clase.

- Eu penso que é de Balbino, que a perdeu cando veu á nosa clase con Pachín o outro día.

- O mellor será mirar as cámaras de seguridade do colexio e así xa sabemos de quen é.

A BOTA MISTERIOSA

Hai uns días, cando chegamos á clase, atopamos unha bota misteriosa no chan. A nosa profe preguntounos axiña se era nosa porque non sería a primeira vez que perdíamos un zapato, pero estaba claro que non era nosa, era demasiado grande.

De quen será?